27/06/2019

காலம் என்பது என்ன? -Time travel 5

நேற்று இன்று நாளை இது தான் எதார்த்தமாக நாம் அறியும் காலம். இரவும் பகலும் மாறிமாறி வருவதை வைத்து நேற்று, இன்று, நாளையை கணக்கிடுகிறோம். பருவநிலை மாற்றத்தை வைத்து வருடத்தை கணிக்கிறோம். பிறப்பு, இறப்பை வைத்து தலைமுறையை கணிக்கிறோம்.

பிறப்பு, இறப்பு என்பதுதான் காலம் நமக்கு மிக முக்கியம் என்பதை உணர்த்துகிறது. பிறப்பு இறப்பு என்ற ஒன்று இல்லை என்றால் காலத்தை பற்றி யாரும் பெரிதாக கவலைப்படப் போவதில்லை.

பிறப்புக்கும் இறப்புக்கும் இடையில் வாழும் காலம். இந்த காலத்தில் திட்டமிட்டு பயணிக்கவே கடிகாரத்தை கண்டுபிடித்துள்ளோம். காலம் என்றால் எல்லோருக்கும் உடனே நினைவுக்கு வருவது கடிகாரம். உலகளாவிய அறிஞர்கள் ஒன்று சேர்ந்து உலக பொது கடிகாரத்தை உண்டாக்கி உள்ளனர். அந்த கடிகார இயக்கத்தின் மீச்சிறு அளவு தான் விநாடி. 60விநாடிகாள் ஒரு நிமிடம். 60 நிமிடம் ஒரு மணி நேரம். 24 மணிநேரம் ஒருநாள். இது எல்லோருக்கும் தெரிந்த விசயம் தான்.

சரி இந்த கடிகாரம் தான் காலத்தின் அளவீடா என்றால், இல்லை என்பது தான் பதில். கடிகாரம் காலத்தை அளக்க பயன்படுத்தும் கருவிகளுள் ஒன்று. நமது சராசரி வாழ்க்கையில் இந்த கடிகாரத்தை பயன்படுத்துகிறோம். அணுவியல் அறிவியலாளர்கள் அணு கடிகாரத்தை பயன்படுத்துகிறார்கள். வானியல் அறிஞர்கள் ஒளி கடிகாரத்தை பயன்படுத்துகிறார்கள்.

ஒளி ஒருவருடத்தில் செல்லும் தூரம் ஒளிவருடம் எனப்படும். ஒளிவருடம் பற்றி யோசித்தால் தலை சுற்றி விடும். வேண்டுமானால் பரிசோதித்து பாருங்கள். ஒளி ஒரு விநாடிக்கு சுமார் 3 லட்சம் கிலோமீட்டர் தூரம் பயணிக்கும். அப்படியானால் ஒரு மணி நேரம், ஒரு நாள் ஒரு வருடம் எவ்வளவு கிலோமீட்டர் பயணிக்கும் என்பதை சும்மா கணக்கு போட்டு பாருங்கள். இந்த தலையை சுற்றும் கணக்குகள் எல்லாம் நமக்கு வேண்டாம்.

அதே போலத் தான் அணு கடிகாரம். அணுவில் நிகழும் எலக்ட்ரான் சுழற்சி அணு கடிகாரத்தை நிர்ணயிக்கிறது. அணுவுள் ஒளித்துகள் எனப்படும் போட்டான் மின்காந்த அலைகளாக இயங்குகிறது. இந்த மின்காந்த அலைகளின் அதிர்வெண் அணுகடிகாரத்தின் மீச்சிறு அளவாக கொள்ளப்படுகிறது. இந்த அளவை கேட்டால் மறுபடியும் தலைசுற்றும். உதாரணமாக ஒரு நொடியில் ஒருலட்சம் பங்கு காலம். ஒருநொடியை ஒருலட்சத்தால் வகுத்தால் என்பதை கற்பனை கூட செய்து பார்க்க முடியாது. ஆனால் இது எல்லாவற்றையும் சாத்தியமாக்கி இருக்கிறது அறிவியல். அறிவியல் தரும் அந்த அற்புத நம்பிக்கையில் தான் நாம் கால இயந்திரத்தை கட்டமைக்க துணிந்துள்ளோம்.

இயல்பான கடிகாரம், ஒளிகடிகாரம், அணுகடிகாரம் இந்த மூன்றுமே அடிப்படையில் சுழல் என்ற ஒற்றை தத்துவத்தில் தான் இயங்குகிறது. துவக்கம்-முடிவு என்ற சுழல் இயக்கம் தான் காலமாக கொள்ளப்படுகிறது.  துவக்கமும் முடிவும் உள்ள எந்த இயக்கத்தையும் காலமாக கொள்ளலாம். காலம் என்பது ஒரு அளவீடு தானே தவிர, காலம் என ஒன்று இல்லை. இயக்கத்தை அளக்க காலம் என்ற அளவீட்டை பயன்படுத்துகிறோம்.

துவக்கம்-முடிவு என்ற சுழல் தான் காலத்தின் அடிப்படை இயக்கம். நிலையாக இருக்கும் எதற்கும் காலம் இல்லை. அதே போல நிலையற்று இருக்கும் எதற்கும் காலம் இல்லை. இரண்டும் மாறி மாறி வரும் எதற்கும் காலம் இருக்கிறது.

நமது உடல் பிறக்கிறது, வளர்கிறது, இறக்கிறது. இந்த இயக்க சுற்றை வாழ்க்கை காலம் என்கிறோம். இங்கு தான் அந்த சுவாரசிய கேள்வி பிறக்கிறது. நாம் பிறக்கிறோம், வளர்கிறோம், இறக்கிறோம் என்பது காலம் என்றால், நாம் மீண்டும் பிறப்போமா?

ஆம் என்ற அற்புத பதிலில் சித்தர்களின் காலப்பயணம் தொடர்கிறது. இல்லை என்ற கசப்பு மருந்தில் அறிவியலின் காலப்பயணம் முடிகிறது.

அறிவு பயணம் தொடரும்...
முந்தைய கட்டுரைகளை படிக்க www.arivakam.org

23/06/2019

கால இயந்திரம் THE TIME MACHINE - Time travel 4

36 வயதுக்கு மேல் தான் காலப் பயணம் குறித்து யோசிக்கிறோம். அதன் சுவாரசியங்களை தேடி ஒடுகிறோம். பள்ளிப் பருவம் என்ற அந்த அழகிய வாழ்க்கை திரும்ப கிடைக்காத என ஏங்குகிறோம். இது தான் சராசரி மனிதர்களின் காலப் பயண தேடல்.

ஆனால் அறிவியலாளர்களின் காலப்பயண தேடல் அது அல்ல. அவர்கள் இந்த பிரபஞ்ச தோற்றத்தின் எல்லைக்கே செல்ல வேண்டும் என நினைக்கின்றனர். சிறுவயதை தாண்டி, தன் தாத்தா காலம், அதற்கு முந்தைய காலம், கற்காலம், டைனோசர் காலம், உயிர்கள் தோன்றா காலம் என பலநூற்றாண்டுகள் கடந்து செல்ல முடியுமா? இது தான் அறிவியலாளர்களின் காலபயண தேடல்.

இன்னும் சில அறிஞர்கள் எதிர்காலம் செல்ல முடியுமா என ஆய்வு செய்கின்றனர். உதாரணமாக 2050க்கு செல்ல முடியுமா என்பது போன்ற ஆய்வுகள் கூட நடக்கிறது.


மெஸ்மெரிசம், ஹிப்னாட்டிசம் பற்றி கேள்விப் பட்டிருப்பீர்கள். இந்த மனவசிய கலை மூலம் ஒருவரது மூளையில் பதிந்துள்ள நினைவுகளை வெளிக் கொண்டு வர முடியும். அதன்படி பள்ளிப் பருவ நினைவுகளை ஒர கனவு போல கொண்டு வர முடியும். ஆனால் அது கனவு தானே தவிர, உண்மையான காலப் பயணமாக இருக்காது.

நமது உடலும் அந்த சின்ன வயதிற்கு செல்ல வேண்டும். நாம் உடலாலும் மனதாலும் பள்ளி பருவத்திற்கு செல்ல வேண்டும். நாம் மட்டுமல்ல, நாம் தொடர்புடைய அத்தனையும் அதே பருவத்திற்கு செல்ல வேண்டும். அது தான் உண்மையான காலப் பயணமாக இருக்கும். இது சாத்தியம் இல்லை என்கின்றனர் அறிவியலாளர்கள்.
உடல் ஒருபோதும் இளமைக்கு திரும்பாது. அப்படி திரும்ப வேண்டும் என்றால் பிரபஞ்சத்தின் மொத்த அடிப்படை இயக்கங்களும் நேர் எதிராக திரும்ப வேண்டும். இது சாத்தியமே இல்லை என்கின்றது அறிவியல்.

அப்படியானால் காலப் பயணம் குறித்து அறிவியலின் கோட்பாடு தான் என்ன?

நமது உடல் இளமைக்கு திரும்பாது, அதே நேரத்தில் காலத்தை இறந்த காலத்திற்கு திருப்பலாம். இது தான் அறிவியலில் காலப் பயண கோட்பாடு. நமது உடல் தற்போதைய நிலையிலேயே இருக்கும். இதே நிலையில் இருந்தவாரே நமது இறந்த காலத்தை நம்மால் பார்க்க முடியும். உணர முடியும். வாழ முடியும். அதே போல நமது எதிர்காலத்தையும் நம்மால் பார்க்க, உணர முடியும். இதற்கு தேவை காலப் பயணம் செய்ய தகுந்த ஒரு இயந்திரம்.

காலப் பயண இயந்திரம் என்பது ஒரு கற்பனை. சுவாரசிய திரைப்படம் எடுக்க வேண்டுமானால் பயன்படும். அனால் எதார்த்தத்தில் அது சாத்தியமில்லை என்பதே பெரும்பான்மை அறிவியலாளர் கருத்து.

சாத்தியமே இல்லை என்று சொல்லப்பட்ட பலவற்றை பிற்காலத்தில் சாத்தியப்படுத்தி உள்ளது அறிவியல். அறிவியலால் முடியாதது எதுவும் இல்லை. அந்த நம்பிக்கையில் நாமும் காலப்பயண இயந்திரத்தை கட்டமைக்க முற்படுவோம்.

காலப் பயண இயந்திரத்தை கட்டமைக்க நமக்கு அடிப்படைத்தேவை காலம், இடம், பரிமாணம் குறித்த அறிவியல் புரிதல்கள். அடுத்து அதிக வெப்பம் மற்றும் குளிரை தாங்கும் உலோகம் அல்லது அலோகம் அவ்வளவு தான்.

அறிவு பயணம் தொடரும்....

18/06/2019

உடலா, இயந்திரமா? Time travel -3

காலப் பயணம் செய்ய நமக்கு தேவை உடலா? இயந்திரமா?

உடலே சிறந்தது என்கின்றனர் சித்தர்கள். இயந்திரமே சாத்தியம் என்கின்றனர் அறிவியலாளர்கள்.


இதில் அறிவியலாளர்களின் கூற்று தான் இப்போதைக்கு சரியாகப் படுகிறது. ஏனென்றால் வெறும் உடலால் மட்டும் முயற்சித்து தோற்றுத் போனர்கள் சித்தர்கள். உடல் வளர்ச்சிதை என்ற விதிக்குள் இயங்குகிறது. மரணம் உடலை சிதைக்கிறது. உடலால் மரணத்தை கடக்க முடியவில்லை. அதிகபட்சம் 60 ஆண்டுகள். அதை தாண்ட சித்தர்களால் முடியவில்லை.  ஆனால் உடலுக்கான ஆயுளை 100 ஆண்டுகள் வரை நகர்த்துவதில் வெற்றி கண்டுள்ளது அறிவியல்.

ஒரு காலத்தில் கூடுவிட்டு கூடுபாயும் கலையில் சித்தர்கள் கைதேர்ந்தவர்களாக இருந்தார்கள். எளிமையாக அவர்களுக்கு அது சாத்தியப்பட்டது. ஆனால் அதை ஒரு மாயையாக உணர்ந்தபோது சித்தர்கள் வெட்கித் தலை குணிந்தார்கள். பொது சமூகத்திடம் ஏமாற்றுகாரர்கள் என்ற கெட்ட பெயர் பெற்றனர்.

கூடுவிட்டு கூடுபாய்தல் என்பது கேலிப்பொருளானது. அதை பற்றி பேச மட்டுமல்ல சிந்திக்கக் கூட சித்தர்கள் தயங்கினார்கள். அத்தோடு அழிந்து போனது அந்த கலை. (கூடவிட்டு கூடுபாய்தல் கலையை அடுத்தடுத்த பதிவுகளில் கற்றுத் தருகிறேன்.)

கூடுவிட்டுகூடு பாய்தல் ஒரு குற்றச் செயல். அது ஒரு மனநோய் என்று உணர்ந்தனர் சித்தர்கள். அதற்கு மாற்றாக அடுத்த ஆராய்ச்சியில் இறங்கினர். அதன் பயனால் விளைந்தது தான் இன்று உலகமே வியந்து பாராட்டும் சித்த மருத்துவம்.

சித்த மருத்துவம் சித்தர்கள் உலகுக்கு அளித்த பொக்கிசம். உடலை வளர்த்தேன் உயிரை வளர்த்தேன் என்ற திருமந்திரத்தில் சித்த மருத்துவம் என்ற அற்புதம் பிறந்தது. அதுவே மருத்துவ அறிவியலுக்கும் அடித்தளம் அமைத்துக் கொடுத்தது.

இனி அறிவியலுக்கு வருவோம்.

உடல் என்பது வளர்ந்து சிதையும். இயந்திரம் அப்படி அல்ல. அது வளராது அதே நேரத்தில் சிதையவும் செய்யாது. வளராவிட்டாலும் பரவாயில்லை சிதையாமல் இருந்தால் போதும். எனவே இயந்திரமே காலப் பயணத்திற்கு சிறந்தது என்பதில் உறுதியாக உள்ளனர் அறிவியலாளர்கள்.

இந்த பிரபஞ்சம் பல கருந்துளைகளை கொண்டுள்ளது. இந்த கருந்துளைகளில் காலம் மிக மிக மெதுவாக செல்கிறது. கருந்துளைகளுக்கு இடையே உள்ள wormhole பிரபஞ்சத்தின் எதிர்பிரபஞ்சத்தை இணைக்கும் இணைப்பு பாலம். இந்த பாலத்தின் வழியே கடந்து செல்லும் இயந்திரத்தை கண்டு பிடித்து விட்டால் குறுகிய காலத்தில் எதிர்பிரபஞ்சத்தை அடைந்து விடலாம். அந்த எதிர் பிரபஞ்சம் நமது தற்போதைய பிரபஞ்சத்தின் காலக் கண்ணாடி. அங்கிருந்து நமது தற்போதைய இறந்த நிகழ் எதிர்கால பிரபஞ்சங்களை பார்க்க முடியும். இது தான்  காலப் பயணம் குறித்த அறிவியலாளர்களின் கோட்பாட்டு சுருக்கம். இது குறித்து அடுத்தடுத்த பகுதிகளில் விரிவாக பார்க்கலாம்.

அறிவு பயணம் தொடரும்....

16/06/2019

அறிவியலா? ஆன்மீகமா? Time travel - 2

காலப்பயண Time travel ஆராய்ச்சியில் இருபிரிவினர் ஈடுபட்டுள்ளனர். 1.அறிவியலாளர்கள், 2.சித்தர்கள். அறிவியலாளர்கள் தேர்ந்தெடுத்த பாதை ஒளியின் வேகம். சித்தர்கள் தேர்ந்தெடுத்த பாதை கூடுவிட்டு கூடு பாய்தல். 

இந்த இரண்டு பாதைகளில் எது சரி, எது தவறு என இன்று வரை தீர்மானிக்க முடியவில்லை. காரணம் இரண்டு பாதைகளுமே கருத்தியலில் தான் உள்ளதே தவிர, செயல்முறை விளக்கங்கள் இல்லாதவை.

அறிவிலா? ஆன்மீகமா? எது சரியான பாதை? என்ற கேள்வியே காலப்பயணத்திற்கான அடித்தளமாக அமைகிறது. அறிவியல் வேறு ஆன்மீகம் வேறு அல்ல. அறிவை தேடி நாம் பயனிக்கும் இருபாதைகள் தான் அறிவியலும் ஆன்மீகமும். 

அறிவியலுக்கும் ஆன்மீகத்துக்கும் ஒரே ஒரு வேறுபாடுதான். நமக்கு ஏற்றவாறு பிரபஞ்சத்தை வளைப்பது அறிவியில். பிரபஞ்சத்துக்கு ஏற்றவாறு நம்மை வளைத்துக்கொள்வது ஆன்மீகம். ஆக இரண்டுமே அறிவின் பயணங்களே தவிர அறிவியல் மட்டுமே அறிவுடமை. ஆன்மீகம் என்பது மூடநம்பிக்கை என ஒதுக்குவது தவறு.

நமக்கு ஏற்றவாறு பிரபஞ்சத்தை வளைப்பதா? பிரபஞ்சத்துக்கு ஏற்றவாறு நாம் வளைவதா? 

காலத்தை வளைத்து நமக்கு ஏற்றவாறு மெதுவாகவும், வேகமாகவும் பயணிக்க செய்தால், காலப்பயணம் சாத்தியம் என்கின்றனர் அறிவியலாளர்கள். காலத்திற்கு ஏற்றவாறு நாம் வளைந்து சென்றால் காலம் கடந்து வாழமுடியும் என்கின்றனர் சித்தர்கள். 

காலத்தை கடக்கும் இயந்திரம் வேண்டும் என்கின்றனர் அறிவியலாளர்கள், காலம் கடக்கும் உடல் வேண்டும் என்கின்றர் சித்தர்கள். இதில் சித்தர்களை விட அறிவியலாளர்கள் தான் தொடர் வெற்றியை பெற்று வருகிறார்கள். காலம் கடக்கும் உடல் தனிமனித தேடலாக சுருங்கியதால் தோற்றவர்களாக நிற்கின்றனர் சித்தர்கள்.

சித்தர்கள் கண்டறித்த எண்ணயியலை(மனக்கணக்கு), எண்ணியலாக(எண்கணக்கு) மாற்றியது தான் அறிவியலாளர்களின் முதல் வெற்றி. அதுவே அறிவியலின் அடுத்தடுத்த பிரமாண்ட வெற்றிகளுக்கு அடித்தளமாக அமைந்து விட்டது.

எண்ணயியலா(ஆன்மீகம்)? எண்ணியலா(அறிவியல்)? - நமக்கு எளிமையான பாதை எது?
காலத்தை கடக்கும் உடலா?, காலத்தை கடக்கும் இயந்திரமா? - நாம் எதை தேர்ந்தெடுக்க போகிறோம்?

அறிவு பயணம் தொடரும்....

14/06/2019

அறிவு பயணம் Time travel - 1

 கால பயணம் சாத்தியமா? நான் என் சிறுவயதிற்கு திரும்ப செல்ல முடியுமா? எதிர்காலம் எப்படி இருக்கும்? மரணம் இல்லாத வாழ்வு கிடைக்குமா? இவை நமக்குள் உற்சாகத்தை தரும் கேள்விகள்!

இந்த கட்டுரைத் தொடரை சமூக வலைதளத்தில் எழுதுவதால், சுருக்கமாக கூடுதல் விளக்கங்கள் இல்லாமல் எழுத முயல்கிறேன். ஒவ்வொரு கட்டுரையும் 100 வார்த்தைகளுக்கு மிகாமல் எழுத முற்படுகிறேன். விளக்கம் தேவைப்படுபவர்கள் மட்டும் பின்னூட்டம் வழி கேளுங்கள். அல்லது எனது மின்னஞ்சல், இணையதளம் வழியாகவும் விளக்கம் பெறலாம். 

வேற்று கிரகங்களில் உயிரினங்கள் உள்ளனவா, அங்கு மனிதர்கள் வாழ முடியுமா? என்பது போன்ற ஆராய்ச்சிகள் தீவிரமாக நடந்து வருகின்றன. கடந்த 50 ஆண்டுகளாக காலப்பயணம் ஆராய்சி தான் வானியலாளர்களின் தீவிர தேடல்.
இதற்கு அவர்கள் இறுக பிடித்துள்ள கோட்பாடு கருந்துளை(பிளாக் ஹோல்) மற்றும் காலவெளி (ஸ்பேஸ்டைம்) சார்பியல் கோட்பாடு.

கருந்துளை மற்றும் ஸ்பேஸ்டைம் ஆராட்சிகள் புதிருக்குள் புதிராக தான் தொடர்கிறது. இன்று வரை ஒரு தீர்வையும் தந்துவிடவில்லை. ஹாலிவுட் திரைப்பட இயக்குனர்கள் கூட சில தீர்வை முன்வைத்து விட்டார்கள். ஆனால் காலப் பயண ஆராட்சியாளர்கள் இன்னும் மௌனிகளாகவே இருக்கிறார்கள். 

கணக்குகளுக்கு மேல் கணக்கை போட்டு ஒருபுறம் காகிதத்தில் நடக்கிறது  காலப்பயண ஆராட்சி  . இன்னும் சில அறிவியலாளர்கள் காலப் பயணத்திற்கு ஒரு இயந்திரத்தை கண்டுபிடிக்க முற்படுகிறார்கள். ஆனால் சர்வதேச வானியலாளர்களால்   
கவனிக்கபடாமல் போன விசயம் சித்தர் இலக்கியம். 

சித்தர் இலக்கியம் என்பது ஏதோ தமிழாசிரியர்கள் மட்டும் படிக்கும் ஒரு பாடப்பிரிவாக சுருங்கி விட்டது. சித்தர் இலக்கியம் என்றால் சித்தமருத்தும் தொடர்புடையது என்ற குறுகிய வட்டத்திற்குள் அடைபட்டு விட்டது.

கடவுள் யார்?, பிரபஞ்ச தோற்றம் இயக்கம் ரகசியங்கள் என்ன?, மரணம் ஏன் சம்பவிக்கிறது?, அல்லா, இயேசு, சிவபெருமான், பெருமாள் என தெய்வ சக்திகள் உண்மையா?, சொர்க்கம் நரகம் உண்டா?, இப்படி எளிமையான கேள்விகளுக்கு சித்தர் இலக்கியங்கள் அறிவியல் பூர்வமான விளக்கங்களை தருகின்றன. காலப்பயணம் குறித்து அதிதீவிரமாக ஆய்வு செய்த சித்தர்களை இன்றைய வானியல் அறிவியலாளர்கள் கவனிக்காமல் போனது வியப்பாக உள்ளது.

சித்தர் இலக்கியங்களையும் அறிவியலையும் ஒரு சேர சீர்தூக்கி பார்க்கும் ஒரு சிறு முயற்சி தான் இந்த அறிவு பயணம் கட்டுரைத் தொடர்.

சித்தர் இலக்கியம் என்றதும் ஓ இது ஏதோ சாமியார் மேட்டர் போல என யாரும் ஓடி விட வேண்டாம். இது முழுக்க முழுக்க அறிவியல் கட்டுரை. நியூட்டனின் ஈர்ப்பு விசை முதல் ஐன்ஸ்டீனின் சார்பியல் கோட்போடு, ஸ்டிபன்ஹாங்கின் கருந்துளை விசயங்கள், ஏலியன்ஸ் என அதே அறிவியல் போக்கில் தான் ஆராய்ச்சி செய்யப் போகிறோம். சின்ன வேறுபாடு நாம் கொஞ்சம் எதார்த்தமாக பயணிக்கப் போகிறோம் அவ்வளவே.

அறிவு பயணம் தொடரும்.

12/06/2019

அறிவு பயணம் ( TIME TRAVEL )

அறிவு பயணம் ( TIME TRAVEL )
..........................................
கால பயணம் குறித்த அறிவியல் ஆராய்ச்சியில் ஆர்வம் உள்ளவர்கள் இந்த கட்டுரை தொடரில் பயணிக்கலாம்..
பிரபஞ்சம் எப்படி தோன்றியது., அதன் அடிப்படை இயக்கம் என்ன?, கடவுள்?, காலசக்கரத்தை பின்னோக்கி சுழற்ற முடியுமா? கூடுவிட்டு கூடு பாயும் கலை என்ன? இது போன்ற பல கேள்விகளுக்கு அறிவியல் ரீதியிலான ஆய்வியல் பயணம் தான் இந்த கட்டுரைத் தொடர்...