20/07/2019

காலமரணம் - Time Travel END

மரணம் ஏன் ஏற்படுகிறது? கொலை, தற்கொலை இந்த 2 காரணங்களால் தான் மரணம் ஏற்படுகிறது. கொலை செய்யப்படாவிட்டால் நிச்சயமாக நாம் மரணத்தை சந்திக்க வேண்டிய அவசியம் இல்லை.

கொலை என்பது மரணத்தின் 2ம் தேர்வு தானே தவிர முதல் தேர்வு அல்ல. தற்கொலை தான் மரணத்தின் முதல் தேர்வாக இருக்கிறது. நீங்கள் கொலை செய்யப்படாமல் இருக்கலாம். ஆனால் தற்கொலை என்பது உங்களுக்கு நிகழ்ந்தே தீரும்.

இங்கு தற்கொலை குறித்து தெளிவான புரிதல் அவசியம்.

காதல் தோல்வி, பணமின்மை, விரக்தி, இவற்றால் தற்கொலை செய்து கொள்வது தற்கொலை அல்ல. அது கொலை என்பதை நினைவில் வையுங்கள். உங்களை நீங்களே கொலை செய்கிறீர்கள். அவ்வளவு தான். விபத்து, நோய்வாய்ப்படல் என்பதும் கொலை தான்.

நான் இங்கு குறிப்பிடும் தற்கொலை என்பது உடல் தானாக தற்கொலை செய்து கொள்வது.

உடல் பிறக்கிறது, வளர்கிறது, இளமை கடந்து முழுமை அடைகிறது. 40 வயதில் உச்சத்தில் இருக்கும் உடல், பின்னர் தற்கொலை பாதையை தேர்ந்தெடுக்கிறது. மெல்ல மரணிக்க துவங்குகிறது.

உடலின் அடிப்படைக் கட்டமைப்பு செல்கள். இந்த செல்கள் 40 வயதுக்கு மேல் உறுப்புகளின் பணிகளுக்கான ஒத்துழைப்பை நிறுத்துகின்றன. உறுப்புகள் ஓய்வதால் உடலும் ஓய்கிறது. கடைசி உறுப்பான மூளை ஓய்ந்ததும் மரணம் சம்பவித்து விடுகிறது.



மரணத்தின் முதல் படி செல்களின் வேலைநிறுத்தப் போராட்டம். இந்த வேலைநிறுத்தப் போராட்டத்தை அறிவியலாலும், ஆன்மீகத்தாலும் இன்று வரை சமரசப்படுத்த முடியவில்லை. வேலை நிறுத்தத்தில் ஈடுபட்டுள்ள செல்களை நீக்கிவிட்டு இயந்திரத்தை பொறுத்தி அறிவியல் வெற்றி கண்டது. ஆனால் அது தற்காலிக ஏற்பாடு தானே தவிர நிரந்தரம் இல்லை. செல்களின் தொடர் வேலை நிறுத்தம் மூளையை முடக்குகிறது. இறுதியில் மூளையும் முடங்கிப் போகிறது.

மூளைக்கான மாற்று இயந்திரத்தை கண்டு பிடித்துவிட்டால் மூளையின் பணிகளை தொடரலாம். இயந்திர மூளை, இயந்திர உடல் இது மட்டுமே மரணத்தை வெல்ல அறிவியலின் ஒரே வழி. இதை நோக்கிய ஆராய்ச்சியில் அறிவியல் தீவிரப்பட்டுள்ளது.

மரணத்தை வெல்ல இங்கே இரண்டு வாய்ப்புகள் இருக்கின்றன.

1. இயந்திர உடல், 2. உடல் செல்களின் தற்கொலையை தடுத்தல்.

இதில் இரண்டாமதை தான் சித்தர்கள் சித்தமருத்துவமாக போதித்துள்ளனர். காலப்போக்கில் அது கடவுளுடன் தொடர்பு படுத்தியதால் அழிந்து போனது. அதை மீட்டெடுத்தால் நிச்சயமாக மரணத்தை வெல்லலாம். 

காலப் பயணத்தின் இறுதிக்கு வருவோம்.

காலப்பயணமா?
மரணம் இல்லாத வாழ்வா?
 -  இரண்டில் எதை தேர்ந்தெடுத்தீர்கள்?

மரணம் இல்லாத வாழ்வை தேர்ந்தெடுத்து இருந்தால் நீங்கள் பாக்கியசாலி. ஏனென்றால் காலப்பயணம் என்பது சாத்தியமே இல்லாதது. அது ஓரு கற்பனை. அது ஒரு சுவாரசியம். அதை தாண்டி அதில் ஒன்றுமில்லை. காலமரணம் காலப்பயணத்திற்கு சமாதி கட்டி விடுகிறது. உங்கள் மரணத்துடன் உங்கள் காலமும் முடிந்து விடுகிறது. இல்லாத ஒரு காலத்திற்கு நீங்கள் எப்படி பயணிக்க முடியும்? 

காலப்பயணத்திற்கு ஒரே வழி மரணத்தை வெல்வது மட்டும் தான். மரணம் இல்லாத வாழ்வு நிச்சயம் சாத்தியப்படும். அறிவியலும் சித்த மருத்துவமும் கைகோர்த்தால்!

நமது முன்னோருக்கு கிடைக்காத மரணம் இல்லாத வாழ்வு நிச்சயம் நமக்கு கிடைக்கும். ஆம் அறிவியல் வேகமாக வளர்ந்து கொண்டிருக்கிறது. அந்த வேகத்தில் சித்தமருத்துவத்தை கொண்டு சேர்க்க வேண்டும். அதை செய்து விட்டால் நிச்சயமாக நமக்கு மரணம் என்பதே இல்லை.

கட்டுரை தொடர் சுருக்கம் : முதன் முதலில் காலப்பயண ஆய்வு செய்தவர்கள் சித்தர்கள். சித்தர்கள் காலப்பாயண ஆய்வில் தோல்வி அடைந்தனர். அதற்கு மாற்றாக சித்த மருத்துவத்தை கண்டு பிடித்தனர். காலப் பயணத்துடன் தொடர்புடையது பரிமாணமும் பரிணாமமும். பரிமாணமும், பரிணாமமும் தான் உயிரியக்கத்தின்  6 அறிவுகளாக விரிந்துள்ளது. உயிர் இயக்கத்தின் இறுதி பரிணாமமாக கடவுள் கோட்பாடு வருகிறது. மரணத்தை வெல்பவர் கடவுளாகிறார். அப்படி ஒருவர் இதுவரை கண்டறிப்படவில்லை. உடல் செல்களின் தற்கொலையால் மரணம் நிகழ்கிறது. மரணத்தை வெல்ல கண்டுபிடிக்கப்பட்டது தான் சித்த மருத்துவம். மரணத்தை வென்று விட்டால் காலப்பயணம் என்பது சோதிடத்தின் ஒரு பகுதியாக மட்டுமே இருக்கும்.

காலப்பயணம் முற்றும்....
முந்தைய கட்டுரைகளை படிக்க : www.arivakam.org

17/07/2019

கடவுள் யார்? - Time Travel 9

கடவுள் யார்? இயேசு கிறிஸ்துவா?, அல்லாவா?, சிவபெருமானா?, ராமரா? சூரியனா? அல்லது வேறு யாருமா? இது தான் உலகில் மிகப்பெரிய கேள்வி!

கடவுளே இல்லை என்பதை அறிவியலால் நிரூபிக்க முடியவில்லை. கடவுள் இருக்கிறார் என்பதையும் சித்தர்களால் நிரூபிக்க முடியவில்லை. காலசூழலுக்கு தகுந்தால் போல கடவுள் இருக்கிறார்/இல்லை என்று நாம் கடந்து விடுகிறோம்.

வாழ்நாள் முழுவதும் கடவுள் இருக்கிறார் என்று வாழ்ந்த மனிதனும் இல்லை. கடவுளே இல்லை என்று வாழ்ந்த மனிதனும் இல்லை.

சரி யார் தான் அந்த கடவுள்?

கேள்வியை விட பதில் மிக எளிமையானது. மரணத்தை வென்றவர் கடவுள்! மரணம் என்ற அளவுகோல் தான் கடவுளையும் மனிதனையும் பிரிக்கிறது.


சிவபெருமான் சகாவரம் பெற்றவர் என்றால் அந்த சிவபெருமான் இப்போது எங்கே போனார்? இதே எதார்த்த கேள்வி இயேசுவுக்கும், அல்லாவுக்கும், ராமருக்கும் பொருந்தும். இயேசு மூன்றாம் நாள் உயிர்த்து எழுந்தார் என்றால் ஏன் இப்போது அவர் உயிரோடு இல்லை?, பரலோகத்தில் இருக்கிறார். கிரேத யுகத்தில் வருவார் என்ற கற்பனை கதைகள் எல்லாம் அறிவியலுக்கு எடுபடாது.

மரணம் இல்லாத ஒரு மனிதன் இருக்கிறார் என்றால் கண்ணை மூடி நம்பலாம் அவர்தான் கடவுள் என்று. அவர் இயேசுவாக வந்தாலும் சரி, ராமராக வந்தாலும் சரி, வேற்றுகிரக வாசியாக வந்தாலும் சரி.

மரணத்தை வென்றவர் தான் கடவுள். நானோ, நீங்களோ மரணத்தை வென்றாலும் நாம் கடவுள் தான்.

மரணம் என்ற ஒன்று இல்லை எனில் மனிதனுக்கு கடவுள் தேவை இல்லை. உங்களுக்கு மரணமே இல்லை என்றால் நீங்கள் யாருக்கு பயப்பட வேண்டும்? எதையும் சாதிக்க உங்களால் முடியும் போது நீங்கள் தானே கடவுள்!

சரி காலப்பயணம் விடயத்திற்குள் வருவோம்

9 கட்டுரைகளில் காலப்பயணம் குறித்து பேசிவிட்டோம். அடுத்து 10வது இறுதி கட்டுரை. அதில் ஒரு தீர்க்கமான பதிலை நான் தந்தாக வேண்டும். இல்லை என்றால் உங்கள் நேரத்தை வீணடித்த குற்றத்திற்கு ஆளாவேன்.

இங்கே உங்களுக்கு இரண்டு வாய்ப்புகள் தருகிறேன்

பத்தாவது கட்டுரையில் நான் எதை நிரூபிக்க வேண்டும்?

1.காலப்பயணத்தை நிரூபித்துக் காட்ட வேண்டும்!
2.மரணத்தை வென்று காட்ட வேண்டும்!

இந்த 2ல் ஒன்றை 10வது இறுதி கட்டுரையில் ஆராய்வோம். ஆனால் 2ல் எது என்பதை வாசகர்களாகிய நீங்கள் தான் தேர்வு செய்ய வேண்டும்.

இரண்டும் வேண்டும் என மழலைவாதம் செய்யக் கூடாது. ஏனென்றால் காலப்பயணமும், மரணம் இல்லாத வாழ்வும் நேர் எதிர்எதிர் ஆனவை.  இரண்டையும் ஒரே நேரத்தில் பெற முடியாது.

1.நீங்கள் காலப் பயணத்தை தேர்வு செய்தால் இறந்த காலத்திற்கு செல்லலாம், எதிர்காலத்திற்கும் செல்லலாம். ஆனால் மரணம் நிச்சயம். 

2.மரணம் இல்லாத வாழ்வை தேர்ந்தெடுத்தால் இறந்தகாலத்திற்கோ, எதிர்காலத்திற்கோ செல்ல முடியாது. ஆனால் மரணம் இல்லாத வாழ்வு வாழலாம். 

இரண்டில் எது வேண்டும் உங்களுக்கு?

அதிக வாசகர்கள் தேர்வு செய்யும் விடயத்தை 10வது இறுதி கட்டுரையாக முடிக்கிறேன்.

அறிவுப் பயணம் தொடரும்....

முந்தைய கட்டுரைகளை படிக்க : www.arivakam.org

15/07/2019

7ம் அறிவு என்பது என்ன? - Time Travel 8

தொடு உணர்வு, சுவை உணர்வு, நுகர் உணர்வு, பார்வை உணர்வு, கேட்டல் உணர்வு, மன உணர்வு என்பவை தான் 6 அறிவு பரிணாமங்கள். இந்த 6 அறிவில் அறிவியலுக்கும் சித்தர்களும் முரண்படு இல்லை. ஆனால் 7ம் அறிவு எது என்பதில் தான் பெரும் முரண்பாடு. 7ம் அறிவு எது என்பதில் சித்தர்களுக்குள்ளேயே முரண்பாடு உள்ளது.

ஒரு அறிவு முதல் 6 அறிவு வரை உயிராக இருப்பது ஆன்மா என்ற புதிரான வாதத்தில் சித்தர்களே பிளவுபடுகின்றனர். ஆன்மாவை நம்பும் சித்தர்கள் கடவுள் கொள்கை உடையவர்களாகவும், ஆன்மாவை ஏற்காத சித்தர்கள் கடவுள் மறுப்பு கொள்கை உடையவர்களாகவும் பிரிகின்றனர்.

ஆன்மாவை 7வது பரிணாமமாக ஒரு பிரிவு சித்தர்கள் கூறுகின்றனர். அறிவை 7வது பரிணாமமாக மறுபிரிவு சித்தர்கள் விளக்குகின்றனர்.
இதில் ஆன்மா கோட்பாட்டை அறிவியல் ஏற்பதில்லை. காரணம் ஆன்மாவிற்கு காலமும், பரிமாணமும் இல்லை. காலமும், பரிமாணமும் இல்லாத ஒன்றை பரிணாமமாக ஏற்க முடியாது என்கிறது அறிவியல். பரிமாணமும், காலமும் அறிவியலுக்கு தான் தேவை. கடவுளுக்கு அது தேவை இல்லை என்கின்றனர் ஆன்மா வாதிகள். பரிமாணமும், காலமும் உள்ள மனிதனுக்கு பரிமாணமும் காலமும் இல்லாத கடவுளே தேவையில்லை என முடித்துக்கொள்கிறது அறிவியல்.

அப்படியானால் 7வது பரிணாமம் எது?

பகுத்தறிவு என்று உறுதியாக சொல்கின்றனர் சித்தர்கள். பகுத்தறிவு தான் 7ம் அறிவு. மனம் என்பது வெறும் நினைவு தொகுப்பு மட்டுமே. நினைவை பகுத்தறியும் பகுத்தறிவே 7ம் பரிணாமம். பகுத்தறிவே 7ம் அறிவு என்பதை அறிவியலும் ஏற்றுக்கொள்கிறது. ஏனென்றால் பகுத்தறிவு தான் அறிவியலாகவே பரிணாமம் அடைந்துள்ளது. இங்கே சித்தர்களும் அறிவியலாளர்களும் கைகோர்த்துக் கொள்கிறார்கள்.

பகுத்தறிவு தான் 7ம் அறிவு என்றால் இயற்கை என்ன ஆவது? படைப்பின் அர்த்தமே பாழாகிப்போகும். மனம் என்பது மிருகமாகும். மனிதன் கீழ்நிலையான மிருகமாவது எப்படி 7ம் பரிணாமமாகும் என எதிர்வாதம் வைக்கின்றனர் ஆன்மீகவாதிகள்.

ஆன்மா கோட்பாட்டில் கடவுளுடன் பரிணாமப் பயணம் முடிகிறது. புல்லாகி பூண்டாகி புழுவாகி, பறவையாய், விலங்காய் மனிதனாய் பிறப்பு எடுத்த ஆன்மா, மனிதனுக்கு பின் தெய்வமாய் உறைந்துவிடும் என்பதே ஆன்மா கோட்பாடு.

மனிதன் தெய்வமாக பரிணாமிக்கும் ஆன்மா கோட்பாட்டை அறிவியல் ஏற்பதில்லை. காரணம் ஆன்மா என்பது மனதின் போதையே தவிர உடல் சார்ந்த உண்மை இல்லை என்கிறது அறிவியல்.

உடலும் மனதும் இணைந்தது தான் உயிர். ஒன்றில் இருந்து ஒன்றை பிரித்தாலும் அங்கே உயிர் இருப்பதில்லை. உடல் இல்லாத உயிரை மனிதன் அறிந்தல்லை. அதே போல உயிர் இல்லாத உடலை நாம் உயிர் என உணர்வதில்லை. அப்படி உணர்வது மூடநம்பிக்கை என்கிறது அறிவியல்.

கடவுள் விடயத்துக்கு வருவோம்

கிறிஸ்துவ இஸ்லாமிய மதங்கள் போதிக்கும் உடல் இல்லாத உயிர் மட்டுமே உள்ள கடவுளை அறிவியல் ஏற்பதில்லை. அதே போல இந்து மதம் போதிக்கும் உயிர் இல்லாத உடல்(சிலை) மட்டும் உள்ள கடவுள்களையும் அறிவியல் ஏற்பதில்லை.

அப்படியானால் கடவுளே இல்லை என்பது தான் அறிவியலா என்றால். அதுவும் இல்லை என்பது தான் பதில். கடவுள் இருக்கிறாரா? என்ற கேள்விக்கு அறிவியலால் இருக்கிறார்/இல்லை என்ற தீர்க்கமான பதிலை தர முடியவில்லை. இருக்கலாம், இல்லாமலும் இருக்கலாம் என அறிவியல் ஒதுங்கிக்கொள்கிறது.

ஆனால் சித்தர்கள் கடவுள் இருக்கிறார் என்ற உறுதியான பதிலை வைத்துள்ளனர்.

கடவுள் இருக்கிறார் என்றால் அந்த கடவுள் யார்? எங்கு இருக்கிறார்? எப்படி இருக்கிறார்? காலத்தை வென்று மரணம் இல்லாத வாழ்வு கடவுளுக்கு எப்படி சாத்தியப்பட்டது? மரணம் இல்லாத வாழ்வு நமக்கும் சாத்தியப்படுமா?

ஆம் என்ற அதிசய பதிலை தருகின்றனர் சித்தர்கள்...

அறிவுப் பயணம் தொடரும்....

முந்தைய கட்டுரைகளை படிக்க : www.arivakam.org

13/07/2019

மனிதன் எப்படி வந்தான்? - time travel 7

குரங்கிலிருந்து மனிதன் பிறந்தான் என நாம் எதார்த்தமாக சொல்வோம். குரங்கு வகையில் மனிதன் ஒரு உயிரினம் என சார்லஸ் டார்வீனின் பரிணாம கோட்பாடு சொல்கிறது.

காலம், பரிமாணம் குறித்து சென்ற பகுதியில் பார்த்தோம். இங்கு பரிணாமம் குறித்து பார்க்கப் போகிறோம்.

உலகில் முதல் முதலில் தோன்றியது ஒரு செல் உயிரினம். ஒரு செல் உயிரினம் பல செல் உயிரினமாகி, மனிதன் வரை பரிணாமம் அடைந்திருக்கிறது என்கிறது அறிவியல். பரிணாமம் என்றால் மேம்பாடு என்று பொருள்.

முதன் முதலில் இந்த உலகில் தோன்றிய உயிரினம் புல் பூண்டு என்ற தாவரங்கள், அடுத்து நத்தை, புழு போன்ற ஊர்வன உயிரினங்கள், அடுத்து வண்டு, பூச்சிகள், அடுத்து பறவைகள், அடுத்து விலங்குகள், பின்னர் மனிதன். என சித்தர்கள் உயிரின பரிணாமத்தை விளக்குகிறார்கள். தாவரம், புழுக்கள், பூச்சிகள், பறவைகள், விலங்குகள், மனிதன். இந்த ஆறு அடுக்குகளை ஆறு அறிவாக சித்தரிக்கிறார்கள் சித்தர்கள்.

ஒரு அறிவு உயிரினம் தாவரம், இரண்டு அறிவு உயிரினம் புழுக்கள், மூன்று அறிவு உயிரினம் பூச்சிகள், நான்கு அறிவு உயிரினம் பறவைகள், ஐந்து அறிவு உயிரினம் விலங்குகள், ஆறு அறிவு உயிரினம் மனிதன்.

சுமார் 3000 ஆண்டுகளுக்கு முன்னரே சித்தர்கள் இந்த அறிவியல் கோட்பாட்டை வகுத்துள்ளனர். இதில் தொல்காப்பியம் ஒன்று தான் நமக்கு ஆதாரமாக கிடைத்துள்ளது. தொல்காப்பியத்தில் மட்டுமே ஆறு அறிவு பரிணாம கோட்பாடு விவரிக்கப்பட்டு உள்ளது. இது தமிழுக்கு கிடைத்த மிகப்பெரிய பெருமை. உலகின் வேறு எந்த பழமையான இலக்கியங்களிலும் பரிணாம கோட்பாடுகள் இல்லை. எல்லாம் கடவுள் படைத்தார் என்ற ஒற்றை வரியில் முடித்துக் கொள்கின்றன. 

அறிவியல் வளர்ந்த இந்த 21ம் நூற்றாண்டில் பரிணாமத்தின் ஆணிவேராய் தொல்காப்பியம் இருப்பதில் தமிழர்களாக நமக்கு கூடுதல் பெருமை.

சரி அறிவியலுக்கு வருவோம்.

பரிணாமம் குறித்து அறிவியல் இன்று வரை ஒரு முழுமையான கோட்பாட்டை தரவில்லை. சார்லஸ் டார்வீன் பரிணாம கோட்பாடுகள் ஓரளவு ஏற்றுக்கொள்ளப் படுகிறது. அதுவும் உயிர் தோற்றம் பற்றி எதுவும் குறிப்பதில்லை. உயிர் மேம்பாடு பற்றி மட்டுமே விவரிக்கிறது. அந்த விவரிப்பில் தான் மனிதன் குரங்கிலிருந்து வந்திருக்கலாம் என்ற கருத்து பிரபலமானது.

கால சூழலை வெல்ல உயிரினங்கள் கடுமையாக போராடுகின்றன. அதற்காக தங்கள் உடலை நீட்சிக்கவோ, குறுக்கிக்கொள்ளவோ முயல்கின்றன. அந்த முயற்சியில் வெல்லும் உயிரினங்கள் தொடர்ந்து வாழ்கின்றன என்கிறது அறிவியலின் பரிணாம கோட்பாடு.

இன்று நாம் காணும் தாவரங்கள், விலங்குகள், எல்லாம் பரிணாம போட்டியில் வெற்றி பெற்ற உயிரினங்கள். பரிணாமத்தின் உச்சம் மனிதன் என்கிறது அறிவியல்.

உயிர்வாழ காலசூழலை எதிர்த்து பரிணாமம் அடையும் உயிரினங்களால், ஏன் காலத்தை வெல்ல முடியவில்லை என்பது தான் உச்சகட்ட கேள்வி! உயிர்வாழ உடலை பரிணாமப் படுத்திக்கொள்ளும் உயிரினங்கள் உயிரை நிலைநிறுத்த ஏன் முயற்சிக்கவில்லை? எளிமையாக சொன்னால் மரணத்தை ஏன் வெல்ல முடியவில்லை? 

சூழலை எதிர்கொண்டு வெற்றி பெற்ற உயிரினங்களால், காலத்தை ஏன் வெற்றி கொள்ள முடியவில்லை? பரிணாமத்தின் உச்சம் மனிதனால் முடியாவிட்டால் பரவாயில்லை. காலத்தை வெற்றி கொண்ட வேறு உயிரினங்கள் எதாவது இந்த பிரபஞ்சத்தில் உள்ளனவா?

இந்த கேள்விக்கான விடையை சித்தர்கள் தேடினார்கள். ஆம் மரணத்தை வென்ற கடவுள் இருக்கிறார் என் புரிதலுடன்.

அறிவியல் இன்னமும் தேடிக்கொண்டே இருக்கிறது ஏலியன்ஸ், வேற்று கிரகவாசிகள் என்ற புதிருடன்...

அறிவுப் பயணம் தொடரும்...

முந்தைய கட்டுரைகளை படிக்க : www.arivakam.org

05/07/2019

முப்பரிமாணம் என்பது என்ன? - Time Travel 6

காலப்பயணம் மேற்கொள்ள மூன்று விசயங்களின் அடிப்படை புரிதல் முக்கியம். 1.காலம், 2.பரிமாணம், 3.பரிணாமம்.

சென்ற பதிவில் காலம் குறித்து பார்த்தோம். இந்த பதிவில் பரிமாணம் குறித்து பார்ப்போம்.

பொதுவாக நமக்கு முப்பரிமாணம் தான் தெரியும். முப்பரிமாணம் குறித்து 6ம் வகுப்பில் படித்திருப்போம். மூன்று கண்ணாடிக்குள் கலர்கலர் வளையல்களை போட்டு முப்பரிமாண சோதனை செய்து பார்த்த அனுபவம் எல்லோருக்கும் இருக்கும்.


உலகிலேயே 2வது சுவையான குடிநீர் சிறுவாணி தண்ணீர் என்பது எல்லோருக்கும் தெரியும். ஆனால் முதல் சுவையான குடிநீர் எது என கேட்டால், யாருக்கும் தெரியாது. அதுபோலத்தான். முப்பரிமாணம் எல்லொருக்கும் தெரியும் முதல் இரண்டாம் பரிமாணங்கள் என்ன என்பது பலருக்கும் தெரியாது. இந்த முதல், இரண்டாம் பரிமாணங்கள் என்ன என தெரிந்து கொண்டால் மட்டுமே நமக்கு பரிமாணம் குறிந்த அடிப்படை புரிதல் வரும்.

ஒரு மாய புள்ளி என்பது சுழிய (0) பரிமாணம். இதற்கு நீளம், அகலம், உயரம் என எதுவும் இல்லை. இப்படி ஒரு புள்ளியை நம்மால் கற்பனை செய்து கூட பார்க்க முடியாது. நாம் காகிதத்தில் வைக்கும் புள்ளிகள் எல்லாமே முப்பரிமாண புள்ளிகள் தான்.


நீளம் என்பது முதல் பரிமாணம், நீளம், அகலம் என்பது இரண்டாம் பரிமாணம், நீளம், அகலம், உயரம் என்பது மூன்றாம் பரிமாணம்.

முதல் பரிமாணம் என்பது நீளம் மட்டும் உடையது. நீளம் மட்டும் உடைய எந்த எந்த பொருளையும் நாம் இதுவரை கண்டுபிடிக்கவில்லை. நம்மால் அறியவோ உணரவோ முடியாது. இரண்டு புள்ளிகளுக்கு இடையில் நாம் வரையும் கோடு முதல் பரிமாணம் தான். ஆனால் அதற்கு நீளம் மட்டுமல்ல அகலமும் உயரமும் சிறிதளவாவது வந்து விடுகிறது. அதனால் நம்மால் முதல் பரிமாணத்தை கற்பனை செய்து பார்கிக்க முடியுமே தவிர பார்க்கவோ, தொட்டு உணரவோ முடியாது.

அடுத்து இரண்டாம் பரிமாணம் என்பது நீளம் அகலம் மட்டும் உடையது. நீளம் அகலம் மட்டும் உடைய பொருட்களை பார்க்க முடியும். தொட்டு உணரமுடியும். ஆனால் அது ஒரு நிழலாக தான் இருக்குமே தவிர உண்மையாக இருக்காது. இரண்டாம் பரிமாணத்திற்கு சிறந்த உதாரணம் நமது நிழல். நிழலை கவனித்து பாருங்கள் அதற்கு நீளம் இருக்கும், அகலம் இருக்கும் ஆனால் உயரம் இருக்காது. காகிதத்தில் வரையும் படம், தொலைகாட்சியில் பார்க்கும் நிகழ்ச்சிகள், சினிமா, வானவில் என்பவை 2ம் பரிமாணத்திற்கு உதாரணங்கள். இவை எல்லாம் நிழல்கள் தானே தவிர உண்மை அல்ல. ஏனென்றால் நம்மால் இரண்டாம் பரிமாணத்தையும் அறிய முடியாது. நாம் எல்லாவற்றையும் முப்பரிமாணமாகத்தான் அறிகிறோம்.

நீளம், அகலம், உயரம் இந்த முன்றும் உள்ள எதுவும் மூப்பரிமாணம் உள்ளவை. நாம் மட்டுமல்ல நம்மை சுற்றியுள்ள அனைத்துமே முப்பரிமாண பொருட்கள் தான்.

நீளம், அகலம், உயரம் என்பது அளவீடுகள் என எதார்த்தமாகவே உங்களுக்கு தெரியும். காலம் என எதுவுமே இல்லை, காலம் என்பது ஒரு அளவீடு என்பது போல, பரிமாணம் என எதுவுமே இல்லை. பரிமாணம் என்பதும் ஒரு அளவீடு தான். நேற்று&இன்று&நாளை என்பது காலம். நீளம் அகலம் உயரம் என்பது பரிமாணம். இந்த காலமும் உண்மை அல்ல, பரிமாணமும் உண்மை அல்ல. இரண்டுமே அளவீடுகள் தான்.

காலமும் பரிமாணமும் மாயை என்றால் எது தான் உண்மை? காலமும், பரிமாணமும் அளவீடுகள் என்றால் அளப்பது யார்?, அளவாக இருப்பது எது? இந்த கேள்விகளில் தான் ஆல்பர்ட் ஐன்ஸ்டின் நினைவுக்கு வருகிறார். கூடவே சித்தர்களும்.

வேகத்தில் காலத்தையும் நீளத்தையும் கரைக்க முற்பட்டார் ஆல்பர்ட் ஐன்ஸ்டீன், அட்டங்க சித்தியில் காலத்தையும், நீளத்தையும் கடக்க முற்பட்டனர் சித்தர்கள், உண்மையில் இருவருமே மாயையை தான் ருசித்தார்கள். அப்படியானால் உண்மை?

அறிவு பயணம் தொடரும்.

முந்தைய கட்டுரைகளை படிக்க www.arivakam.org